बुधबार, १ असोज, २०७६
Wednesday, 18 September, 2019
Skip Advt.

पुल्चोक इन्जिनियरिङ कलेजका विद्यार्थीको प्रोजेक्ट 'रक्तदान'लाई राइजिङ स्टुडेन्ट अवार्ड

काठमाडाैं । आइसिटी अवार्डमा पहिलो पटक समावेश गरिएको राइजिङ स्टुडेन्ट आइसिटी अवार्ड २०१९ पुल्चोक इन्जिनियरिङ कलेजका विद्यार्थीहरु एलेक्स भट्टराई, अनिश दुलाल, मितेश पाण्डे, निशेष वाले र विवेक तिमल्सिनाले बनाएको प्रोजेक्ट 'रक्तदान' ले जित्न सफल भएकाे छ ।

याे विधामा कुल १८ प्राेजेक्टले सहभागिता जनाएकाेमा 'रक्तदान'ले उत्कृष्ट ११ र त्यसपछि उत्कृष्ट ५ मा स्थान बनाउँदै अवार्ड जितेकाे हाे । उत्कृष्ट ५ मा हेल्प ईआर, नयाँ किनमेल, प्रशासन-ई र वाटर टेस्टर एपले  पनि प्रतिष्पर्धा गरेका थिए । निर्णायकको मूल्याकंन र पब्लिक भोटिङको आधारमा अन्य प्रतिस्पर्धीलाई पछि पार्दै रक्तदानले यो अवार्ड जित्यो ।

यो क्रस प्लाटफर्म एप्लिकेशन हो जसले रक्तदानसम्बन्धी विद्यमान समस्याको छिटो र छरितो हिसाबले समाधान गर्ने उद्धेश्य राखेको छ । समाजमा हुने रक्तदान अभियानहरुलाई यो एपले हल गर्न खोजेको छ ।

सोसल मिडियामा अहिले रक्तदानसम्बन्धी विभिन्न ग्रुप र पेज छन् । तर, त्यहाँ सूचनाको गोपनियता देखि रगत दिने र लिनेको सञ्चार हुन धेरै गार्हो छ । यो प्लाटफर्ममा रियल टाइम लोकेशन डाटाबेस अपडेट गरिएको हुनाले कुन मानिस (रक्तदाता) कहाँ छ भनेर रेडियस बेस्ड सर्च गर्न सकिन्छ ।

ब्लड ग्रुपको नाम सर्च गरिसकेपछि आफ्नो वरिपरी को को इच्छुक रक्तदाता रहेका छन् त्यो जानकारी यो एपले दिन्छ । रक्तदान गरेका व्यक्तिहरुले रेस्पेक्ट प्वइन्ट पाउँछन् भने प्राथमिकताको आधारमा हेल्थ सर्भिसका लागि कुपन पाउँछन् । यो एपले रक्तदाताको सम्पर्क नम्बर र सूचना दूरुपयोग हुन दिदैन ।

राइजिङ स्टुडेन्ट आइसिटी प्रडक्ट २०१९ जित्न सफल रक्तदानलाई पूर्वमन्त्री एवं सांसद महेश बस्नेत, वरिष्ठ आइटी विज्ञ एवं अनुसन्धानविद् महावीर पुन, प्रा.डा. मनिष पोखरेल लगायतले सम्मानले गरे । 

यो विधामा प्लस टु, आइटी तथा इन्जिनियरिङ कलेजका विद्यार्थीले बनाएको प्रोजेक्टहरुले प्रतिष्पर्धा गरेका थिए ।

 

सम्बन्धित समाचार
धेरै पढिएको
ट्वीटरमा